Monday, 01 August 2011
មាស សុខជា
The Phnom Penh Post Khmer
ភ្នំពេញៈ ប្រធានគណបក្សសិទ្ធិមនុស្សបានរិះគន់ប្រធានគណបក្សសមរង្ស៊ី ដែលប្រកាសថា នឹងប្រើបដិវត្តន៍ផ្កាម្លិះ ដើម្បីបំផុសឲ្យប្រជាជនផ្តួលរំលំរដ្ឋាភិបាលលោកនាយករដ្ឋ មន្រ្តី ហ៊ុន សែន ប្រសិនបើការបោះឆ្នោតសកលលើកក្រោយមិនត្រឹមត្រូវ និងគ្មានភាពយុត្តិធម៌។
ថ្លែងទៅកាន់សមាជិក៥០០នាក់ ក្នុងការជួបជុំក្រុមប្រឹក្សាថ្នាក់ជាតិលើកទី២ កាលពីថ្ងៃទី៣០ ខែកក្កដា លោក កឹម សុខា ប្រធានគណបក្សសិទ្ធិមនុស្ស មានប្រសាសន៍ថា៖ «បដិវត្តន៍ផ្កាម្លិះមិនជាការល្អសម្រាប់ប្រជាជនឡើយ និងថា បើទោះជាការបោះឆ្នោតខាងមុខនេះមិនត្រឹមត្រូវនិងយុត្តិធម៌ ក៏ដោយ លោកនឹងមិនបំផុសឲ្យប្រជាជនធ្វើបដិវត្តន៍ប្រឆាំងរដ្ឋាភិបាលបច្ចុប្បន្នឡើយ។ លោកអះអាងថា បដិវត្តន៍ប្រឆាំងរដ្ឋាភិបាលនឹងធ្វើឲ្យប្រជាជនបាត់បង់ជីវិត។
លោក កឹម សុខា បានបន្ថែមថា៖ «យើងចង់ឲ្យមានការផ្លាស់ប្តូរតាមរយៈការបោះឆ្នោត ប៉ុន្តែ បើការបោះឆ្នោះគ្មានយុត្តិធម៌នោះមេដឹកនាំគណបក្សសិទ្ធិមនុស្ស នឹងមិននៅស្ងៀមឡើយ យើងហ៊ានលះបង់»។
លោក កឹម សុខា បានថ្លែងថា៖ «យើងគឺជាគណបក្សប្រឆាំង ដែលខុសពីគណបក្សប្រឆាំងមួយដែលបង្កគ្រោះថ្នាក់ដល់ប្រជាពល រដ្ឋរួចហើយ រត់យករួចខ្លួនបាត់»។
ទាក់ទងនឹងការបោះឆ្នោតឃុំ-សង្កាត់ឆ្នាំ ២០១២ លោក កឹម សុខា បានលើកឡើងថា ប្រសិនបើគណបក្សសិទ្ធិមនុស្សឈ្នះការបោះឆ្នោឃុំ-សង្កាត់ ហើយសកម្មជនរបស់គណបក្សនេះក្លាយជាមេឃុំ គណបក្សសិទ្ធិមនុស្សនឹងរៀបចំឲ្យមានឡានពេទ្យក្នុងឃុំ ដើម្បីបម្រើសេវាកម្មជូនពលរដ្ឋ និងសន្យាថា ប្រសិនបើមេឃុំគណបក្សសិទ្ធិមនុស្សណាប្រព្រឹត្តពុករលួយ គណបក្សនឹងដូរប្រធាននោះចេញភ្លាម។
លោក យឹម សុវណ្ណ អ្នកនាំពាក្យរបស់គណបក្សសមរង្ស៊ី មានប្រសាសន៍ថា គណបក្សសម រង្ស៊ី មិននាំប្រជាជនទៅរកស្លាប់ ដោយការធ្វើបវដិវត្តន៍នោះទេ ដោយអះអាងថា ឧប្បត្តិហេតុដែលបានកើតឡើងពីមុនវាកើតឡើងដោយសារតែសុច្ឆន្ទៈ របស់ប្រជាពលរដ្ឋ ព្រោះតែពួកគាត់មិនអាចទ្រាំរស់នៅក្រោមការគាបសង្កត់និងភាពអយុត្តិធម៌។
ជាមួយគ្នាដែរលោកកឹម សុខា មានប្រសាសន៍ថា មេដឹកនាំបក្សកាន់អំណាច ដែលកាន់អំណាចជាង៣០ឆ្នាំ គួរតែមើលប្រទេសវៀតណាមដែលជាមេកើយរបស់ខ្លួន គេដូរមេដឹកនាំខ្លះហើយ។ លោកបានបន្ថែមទៀតថា ការផ្លាស់ប្តូរជាច្បាប់ធម្មជាតិ ព្រោះគ្មាននរណាម្នាក់ អាចនៅកាន់អំណាចមួយជីវិតនោះទេ។
លោកបានបន្តទៀតថា៖ «ប្រសិនបើមើលមិនឆ្ងាយទេ គណបក្សកាន់អំណាចគួរតែមើលប្រទេសដែលជាចៅហ្វាយនាយរបស់ខ្លួន ដែលបានដូរប្រធានាធិបតីរបស់គេ។ ខ្ញុំហ៊ានភ្នាល់ដាក់ជីវិតប្រសិនបើអង្គការសហប្រជាជាតិមករៀបចំការបោះ ឆ្នោតក៏ដោយ គណបក្សប្រឆាំងនឹងនៅតែចាញ់ឆ្នោត»។
លោក កឹម សុខា បានទទួលស្គាល់ថា គណបក្សកាន់អំណាចរបស់លោក ហ៊ុន សែន បានធ្វើឲ្យមានចំណុចវិជ្ជមានមួយចំនួនជូនជាតិ ដូចជា ការពារទឹកដីពីការឈ្លានពានរបស់ប្រទេសថៃ និងកសាងហេដ្ឋារចនាសម្ព័ន្ធមួយចំនួន ប៉ុន្តែ បញ្ហាសំខាន់ដែលជាអាយុជីវិតរបស់ប្រជាពលរដ្ឋគណបក្សកាន់អំណាចមិន អាចដោះស្រាយបានឡើយ។ លោកអះអាងថា៖«ប្រជាជននៅតែក្រ។ អ្នកមាននិងអ្នកក្រនៅមានគម្លាតដាច់ពីគ្នាឆ្ងាយ»។
លោក ជាម យៀប តំណាងរាស្រ្តគណបក្សប្រជាជនកម្ពុជា (CPP)បានច្រានចោលការចោទប្រកាន់របស់លោក កឹម សុខានិងលើកសំអាងថា កម្ពុជាមិនស្ថិតក្រោមអាណានិគមរបស់ ប្រទេសវៀតណាមទេ ហើយ លោក ហ៊ុន សែន បានជាប់ឆ្នោតជានាយករដ្ឋមន្រ្តីតាមរយៈសន្លឹកឆ្នោតប្រជាពលរដ្ឋនិងគាំទ្រដោយរដ្ឋធម្មនុញ្ញ៕ KS
0 komentar:
Post a Comment
Give Your Comment And We Will Response You With Happy. No Moderation Comment, just Do Folow ^_^