ខេត្តប៉ៃលិន ៖ នៅក្នុងថ្ងៃតែមួយមានមនុស្ស២នាក់បានលេបថ្នាំធ្វើអត្តឃាតក្នុងករណី ដោយឡែកពីគ្នា ដែលករណីទី១ យុវជនម្នាក់ឈ្មោះលី លីត អាយុ២៧ឆ្នាំ រស់នៅភូមិសិរីមង្គល សង្កាត់អូរតាវ៉ៅ ក្រុងប៉ៃលិន បានផឹកថ្នាំបំពុលស្មៅប្រភេទ «ទឹកឃ្មុំ» អស់ជិតកន្លះលីត្រប៉ងធ្វើអត្តឃាត ព្រោះខឹងសង្សារបែកចិត្តទៅស្រឡាញ់អ្នកផ្សេង។ ឯករណីទី២ ស្រ្តីឈ្មោះឡាយ ស្រីមុំ អាយុ២៤ឆ្នាំ រស់នៅភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន បានលេបថ្នាំប៉ារ៉ាសេតាម៉ុលអស់៣០គ្រាប់ប៉ងធ្វើអត្តឃាតដែរ ព្រោះតែខឹងប្តីលួចទៅមានស្រីផ្សេង។ ហេតុការណ៍នេះបានកើតឡើងកាលពីថ្ងៃទី១៥ សីហា ឆ្នាំ២០១១ ហើយជនរងគ្រោះត្រូវបានក្រុមសាច់ញាតិដឹកយកមកសង្គ្រោះនៅមន្ទីរពេទ្យបង្អែកខេត្ត និងរួចផុតពីគ្រោះថ្នាក់ដល់អាយុជីវិត ។
តាមយុវជនឈ្មោះលី លីត និយាយថា សង្សាររបស់ខ្លួនឈ្មោះឌួន រី អាយុ១៧ឆ្នាំ រស់នៅខេត្តពោធិ៍សាត់ តែមកស៊ីឈ្នួលចាំចម្ការឲ្យគេ និងបានជួបជាមួយខ្លួននៅខេត្តប៉ៃលិន ហើយក្រោយពីធ្វើការជាមួយគ្នាក៏ចាប់ចិត្តស្រឡាញ់គ្នាមានរយៈពេល១ឆ្នាំ ហើយបើគិតមកដល់បច្ចុប្បន្ន។ បន្ទាប់ពីស្រឡាញ់គ្នាហើយ បែរជានាងជាសង្សារនិយាយថា «ខ្លួនមិនសង្ហា និងមិនសម ដោយប្រាប់ថាសុំបែកផ្លូវគ្នា ព្រោះយើងបានស្រឡាញ់គ្នាត្រឹមតែចិត្តនិងចិត្តប៉ុណ្ណោះ» និងមិនអាចបន្តទៀតបានទេ។ ទោះបីជាយ៉ាងណា រូបគេមិនបានខ្វល់នឹងពាក្យសំដីរបស់នាងជាសង្សារនោះទេ ព្រោះរូបគេស្រឡាញ់នាងខ្លាំងណាស់ ព្រមទាំងបានប្រគល់បេះដូងដែលស្មោះ និងសេចក្តីស្នេហាធំជាងមេឃឲ្យនាងអស់ហើយ។ ដោយមិនដាច់ចិត្តពីនាង ខ្លួនក៏នៅតែបន្តជិតស្និទ្ធជាមួយនាងដដែល ចំណែកនាងជាសង្សារបែរជាបញ្ឈឺចិត្តដោយយកបុរសម្នាក់ទៀត ត្រូវជាបងប្រុសបង្កើតរបស់ខ្លួនឈ្មោះលី លីម អាយុ៣០ឆ្នាំ មកបញ្ឈឺខ្លួនទៅវិញ។
យុវជនលី លីត បានរៀបរាប់ទៀតថា ដោយគិតថា ខ្លួនគ្មានន័យអ្វីទៀតក៏ចង់បញ្ចប់ជីវិតខ្លួនឯងដោយផឹកថ្នាំបាញ់ស្មៅអស់ប្រហែលកន្លះលីត្រ។ ក្រោយពីផឹកហើយមានអាការមិនស្រួលក៏រត់ទៅផ្ទះមេភូមិឲ្យជួយ ហើយពេលទៅដល់ផ្ទះមេភូមិ ក៏ប្រាប់ពីបញ្ហារបស់ខ្លួន បន្ទាប់មកមេភូមិក៏ប្រញាប់នាំមកកាន់មន្ទីរពេទ្យបង្អែកខេត្តជាបន្ទាន់។ ក្រោយពីពេទ្យធ្វើការជួយសង្គ្រោះដោយលាងក្រពះរួចខ្លួនក៏យល់ឃើញឡើងវិញថា មិនត្រូវគិតខ្លីដូចនេះឡើយ ព្រោះជាអំពើឆោតល្ងង់ខ្វះអីប្រុសពេញដី ស្រីពេញនគរនោះ ហើយល្អដែរ ដែលអតីតសង្សារក្លាយជាបងថ្លៃ បើសិនជានាងពិតជាស្រឡាញ់បងប្រុសរបស់ខ្លួនពិតមែន ។
ដោយឡែកស្ត្រីឈ្មោះឡាយ ស្រីមុំ ដែលលេបថ្នាំ ប៉ារ៉ាសេតាម៉ុល អស់៣០គ្រាប់ដើម្បីធ្វើអត្តឃាត ព្រោះខឹងប្តីទៅមានស្រីថ្មីបាននិយាយថា ប្តីរបស់នាងធ្លាប់មានស្រីក្រៅម្តងរួចមកហើយ។ កាលនោះប្តីនាងឈ្មោះឆាក់ ខាណន់ អាយុ២៧ឆ្នាំ បានស្រឡាញ់គ្នាលួចលាក់ ជាមួយស្រ្តីម្នាក់ឈ្មោះញ៉ែម រាត្រី ដែលត្រូវជាបងប្អូនជីដូនមួយរបស់នាង ប៉ុន្តែការអត់ទ្រាំរបស់នាងធ្វើឱ្យរឿងរា៉វនោះបានកន្លងទៅ។ ប៉ុន្តែមិនយូរប៉ុន្មានប្តីនាងក៏លួចលាក់មានស្រីថ្មីជាលើកទីពីរទៀតតាមរយៈការលេងហ្វេសប៊ុក ដោយកំពុងមានទំនាក់ទំនងជាមួយស្ត្រីខ្មែរម្នាក់រស់នៅប្រទេសបារាំង។ ដោយអត់ទ្រាំមិនបានដែលឃើញប្តីមានស្រីថ្មីបែបនេះ ទើបនៅម៉ោង២រសៀល ថ្ងៃទី១៥ សីហា នាងបានយកថ្នាំបា៉រា៉សេតាម៉ុលចំនួន៣០គ្រាប់មកលេប ដើម្បីបញ្ចប់ជីវិតរបស់ខ្លួន។ បន្ទាប់ពីលេបបានបន្តិចស្រាប់តែចាប់ផ្តើមទន់ដៃទន់ជើង ហើយខណៈពេលនាងលេបថ្នាំប្តីរបស់នាងក៏នៅទីនោះដែរ តែមិនរវីរវល់អើពើឃាត់ឡើយថែមទាំងដើរចេញបាត់ទៀត។
ពេលនោះម្តាយកេ្មករបស់នាងឈ្មោះសាយ ផល អាយុ៤៤ឆ្នាំ ចូលមកដល់ឃើញនាងកំពុងដេកដួលក៏ប្រញាប់ស្ទុះស្ទានាំនាងមកកាន់មន្ទីរពេទ្យបង្អែកខេត្ត ហើយពេលមកដល់មន្ទីរពេទ្យ នៅម៉ោង៥ល្ងាចគ្រូពេទ្យក៏បានជួយសង្គ្រោះដោយលាងក្រពះដើម្បីបន្សាបថ្នាំ។ រហូតមកដល់ពេលនេះនាងបានប្រសើរឡើងហើយ ប៉ុន្តែប្តីរបស់នាងមិនបានមកមើលទេ គឺមានតែម្តាយក្មេកប៉ុណ្ណោះ។
នាងឡាយ ស្រីមុំបានបន្តថា នាងនឹងឈប់លេបថ្នាំសម្លាប់ខ្លួនទៀតហើយ ព្រោះនៅអាណិតកូនដែលនៅតូចមិនទាន់ដឹងក្តី ទោះជាគ្មានប្តីរបស់នាងក៏ត្រូវតែព្យាយាមចិញ្ចឹមកូនរហូតដល់ធំដែរ។ លោកគ្រូពេទ្យបាននិយាយថា ប្រជាពលរដ្ឋគួរចៀសវាងការលេបនិងផឹកថ្នាំពុល ព្រោះយើងនៅមានអនាគតវែងឆ្ងាយ គួរតែប្រឈមមុខនឹងបញ្ហាហើយរកវិធីដោះស្រាយ៕
0 komentar:
Post a Comment
Give Your Comment And We Will Response You With Happy. No Moderation Comment, just Do Folow ^_^