ថ្ងៃទី 28-07-2011 ម៉ោង 10:07:31
ខេត្ដរតនគិរី ៖ ក្មេងស្រីអាយុ១០ឆ្នាំម្នាក់ជាជនជាតិគ្រឹង
រស់នៅភូមិតាសុយ សង្កាត់កាទាញ ក្រុងបានលុង ខេត្ដរតនគិរី ត្រូវបានឃាតកចិត្ដក្ដៅល្បួងទៅរំលោភរួចសម្លាប់ចោល នៅក្នុងចំការកៅស៊ូ បន្ទាប់ពីគេដឹងថាឃាតកបានសងសឹកកុមារីរងគ្រោះជូនកូនរបស់ខ្លួនដែលត្រូវកុមារីរងគ្រោះបានច្រានធ្លាក់ពីលើកាំជណ្ដើរ ។
អាចនិយាយបានថា ឈាមស្រែកស្បែកហៅ ឃាតកដ៏ឃោរឃៅនេះត្រូវបានចាប់ខ្លួននៅថ្ងៃទី២៧ ខែកក្កដា ឆ្នាំ២០១១ វេលាម៉ោង៨ព្រឹក បន្ទាប់ពីឪពុកម្ដាយកុមារីរងគ្រោះបានដាក់ពាក្យបណ្ដឹងទៅសមត្ថកិច្ចនគរបាលក្រុងបានលុង នៅថ្ងៃទី២៥ ខែកក្កដា ក្រោយពីបាត់កូនរបស់គាត់មិនដឹងទៅណា ។
លោកតេង សាវី និងអ្នកស្រី ប៉ន ស្មុក ជាឪពុកម្ដាយកុមារីរងគ្រោះបានឱ្យដឹងថា កូនរបស់គាត់ដែលត្រូវឃាតកសម្លាប់មានឈ្មោះសាវី ផល្លី អាយុ១០ឆ្នាំ រស់នៅភូមិឃុំកើតហេតុខាងលើ ។
មន្ដ្រីនគរបាលក្រុងបានលុងបានឱ្យដឹងថា ជនជាប់សង្ស័យដែលបានសម្លាប់កុមារីរងគ្រោះមានឈ្មោះលី ថេង អាយុ៣០ឆ្នាំ ជាកម្មករចៀរជ័រនៅចំការកៅស៊ូសេងតាយ មានស្រុកកំណើតនៅខេត្ដកំពង់ចាម បច្ចុប្បន្នស្នាក់នៅបណ្ដោះអាសន្នក្បែរនឹងភូមិឃុំកុមារីរងគ្រោះនេះដែរ ។
គួរបញ្ជាក់ថា ក្រោយពីឪពុកម្ដាយកុមារីរងគ្រោះបានបាត់កូនពីផ្ទះ គាត់ក៏បានដាក់ពាក្យបណ្ដឹងទៅនគរបាលឱ្យជួយស្វែងរកហើយគ្រានោះជនសង្ស័យលី ថេង ទំនងជាដឹងខ្លួនក៏បានរត់គេច ខ្លួនទៅពួននៅក្នុងព្រៃជ្រៅ ប៉ុន្ដែដោយការរស់នៅគ្មានអាហារក៏បានចេញមកសុំបាយអ្នកស្រុកស៊ីក៏ត្រូវអ្នកភូមិសង្ស័យ ហើយបានប្ដឹងសមត្ថកិច្ចនគរបាលឱ្យចាប់ខ្លួនតែម្ដង ។
ក្រោយចាប់ខ្លួនជនជាប់សង្ស័យបានសារភាពថាខ្លួនពិតជាបានធ្វើសកម្មសម្លាប់កុមារីរងគ្រោះប្រាកដមែន។ បន្ទាប់ពីការសារភាពនៅព្រឹកថ្ងៃទី២៧ ខែកក្កដា ជនជាប់សង្ស័យត្រូវសមត្ថកិច្ច និងឪពុកម្ដាយកុមារីរងគ្រោះដាក់ខ្នោះនាំខ្លួនទៅកាន់ទីដែលគេល្បួងក្មេងស្រីទៅសម្លាប់ចោល ។
ស្នងការរងទទួលបន្ទុកកណ្ដាលយុត្ដិធម៌ខេត្ដរតនគិរី លោកផែន ឌីណា បានប្រាប់នគរវត្ដជុំវិញករណីឃាតកម្មលើកុមារីរងគ្រោះឱ្យដឹងនៅល្ងាចថ្ងៃទី២៧ កក្កដាថា តាមចម្លើយសារភាពជនជាប់សង្ស័យថាករណីដែលគេសម្លាប់កុមារីរងគ្រោះក៏ព្រោះតែសងសឹកឱ្យកូន របស់ខ្លួនការដែលកុមារីរងគ្រោះបានច្រានកូនរបស់គេទម្លាក់ពីកាំជណ្ដើរឱ្យមានរបួស កាលពីពេលកន្លងទៅនោះ។ លោកស្នងការរងរូបនេះបានបញ្ជាក់ថា ដំបូងឡើយសមត្ថកិច្ចក៏បានសន្និដ្ឋានថា ជាអំពើរំលោភរួចសម្លាប់ជាក្រោយ ក៏ប៉ុន្ដែក្រោយពីសមត្ថកិច្ចចុះពិនិត្យ និងធ្វើកោសល្យវិច័យពីក្រុមគ្រូពេទ្យ បានអះអាងថា កុមារីរងគ្រោះមិនត្រូវបានជនសង្ស័យរំលោភនោះទេ ហើយការដែលខ្លួនកុមារីរងគ្រោះអាក្រាត ក៏ព្រោះតែពេលឃាតកល្បួងទៅសម្លាប់ គឺកុមារីរងគ្រោះស្លៀកសំពត់កៅស៊ូ។ លោកបានបញ្ជាក់ថា ការដែលសំពត់កៅស៊ូនៅឆ្ងាយពីខ្លួនកុមារីរងគ្រោះប្រមាណជា១០ម៉ែត្រនោះ គ្រាដែលឃាតកបានសម្លាប់កុមារីរងគ្រោះបានរត់ ហើយត្រូវឃាតកដេញពីក្រោយជាន់ឱ្យរបូតតែប៉ុណ្ណោះ ។
លោកផែន ឌីណា ស្នងការរងខេត្ដរតនគិរីបានឱ្យដឹងទៀតថា ជនជាប់សង្ស័យត្រូវបានចោទប្រកាន់ពីបទមនុស្សឃាតគិតទុកជាមុន ហើយនៅល្ងាចថ្ងៃទី២៧ កក្កដានេះ ត្រូវបានបញ្ជូន ទៅសាលាដំបូងដើម្បីធ្វើការចោទប្រកាន់រួចហើយ ។
គួរបញ្ជាក់ថា កុមារីរងគ្រោះត្រូវបានជនសង្ស័យល្បួងទៅសម្លាប់ចម្ងាយពីផ្ទះ៥០០-៦០០ម៉ែត្រ ដោយឃាតកបានប្រើដំបងដើមកៅស៊ូវាយបំបាក់.ក និងច្របាច់.ក កាលពីថ្ងៃទី២៥ ខែកក្កដា ជាថ្ងៃដែលក្រុមគ្រួសារកុមារីរងគ្រោះនាំគ្នាដើររកកូនតែមិនឃើញ ។
សាកសពកុមារីរងគ្រោះពេលដែលឃាតកនាំទៅបង្ហាញទីកន្លែងសម្លាប់គឺសាកសពត្រូវឃាតកយកមែកស្លឹកដើមកៅស៊ូគ្របពីលើរាងកាយអាក្រាតរបស់កុមារីរងគ្រោះគ្រាដែលសមត្ថកិច្ចភើចទាញមែកកៅស៊ូចេញសាកសពមានសភាពហើម និងសត្វល្អិតរោមស្ទើរមើលពុំស្គាល់ទៅហើយ ៕
0 komentar:
Post a Comment
Give Your Comment And We Will Response You With Happy. No Moderation Comment, just Do Folow ^_^