ថ្ងៃទី 28-07-2011 ម៉ោង 09:22:30
ខេត្ដកំពត ៖ ទូកមួយគ្រឿងដែលដឹកភ្ញៀវទេសចរបរទេសប្រមាណ២៣នាក់ បានលិចនៅដៃសមុទ្រមួយកន្លែងស្ថិតក្នុងក្រុងកំពតបណ្ដាលឱ្យភ្ញៀវដែលជិះនៅលើទូកនោះបានរងគ្រោះ
តែពួកគេបានព្យាយាមហែលមកកាន់ដីគោកដោយខ្លួនឯងគ្មានអាជ្ញាធរណាជួយអន្ដរាគមន៍ឡើយ ។
ហេតុការណ៍ទូកទេសចរណ៍ខាងលើដែលលិចនៅដៃព្រែកកំពតបានកើតឡើងកាលពីវេលាម៉ោង៤និង១៥នាទីរសៀលថ្ងៃទី២៧ កក្កដា ២០១១ នៅកណ្ដាលព្រែកកំពត ស្ថិតក្នុងភូមិកំពង់បាយខាងត្បូង សង្កាត់កំពង់បាយ ក្រុងកំពត ទល់មុខមន្ទីរពេទ្យបង្អែកខេត្ដមានចម្ងាយប្រមាណជាង១០០ម៉ែត្រពីមាត់ច្រាំង ។
មុនពេលកើតហេតុ គេឃើញទូកទេសចរណ៍មួយនេះមានដឹកភ្ញៀវជនបរទេសប្រមាណជាង៣០នាក់ដើម្បីធ្វើដំណើរកម្សាន្ដតាមឆ្នេរសមុទ្រនិងតាមបណ្ដោយព្រែកកំពត។ លុះមកដល់ចំណុចកើតហេតុស្រាប់តែទូកនោះមានស្ថានភាពឃ្លេងឃ្លោង ហើយអ្នកទេសចរទាំងអស់បានជ្រួលច្រាល់ឈូឆរទៅមកបណ្ដាលឱ្យទូកនោះលិចចូលក្នុងសមុទ្រភ្លាមៗតែម្ដង។ ប៉ុន្ដែមិនបណ្ដាលឱ្យជនបរទេសទាំងអស់នោះរងគ្រោះថ្នាក់រហូតដល់ស្លាប់បាត់បង់ជីវិតទេ ។
អ្នកបានឃើញហេតុការណ៍នេះបានរៀបរាប់ថា ទូកទេសចរណ៍មួយនេះមានចំណុះដែលអ្នកស្រុកកំពតហៅថា“ទូកក្ដារ៧គូ”មាន២ជាន់រកស៊ីដឹកភ្ញៀវទេសចរបរទេសទំនងជាគ្មានច្បាប់ទេ។ ជារៀងរាល់ថ្ងៃគេតែងដឹកភ្ញៀវទេសចរបរទេសដែលចង់ដើរកម្សាន្ដតាមផ្លូវទឹក។ ក្នុងពេលកើតហេតុភ្ញៀវទេសចរមួយចំនួនធំបានឡើងជិះលើដំបូលទូកធ្វើឱ្យទម្ងន់ប្រមូលផ្ដុំនៅផ្នែកខាងលើ។ នៅពេលដែលភ្ញៀវជ្រួលច្រាល់ចុះឡើងញ៉ាំងឱ្យទូកនោះមានសភាពឃ្លេងឃ្លោង ហើយផ្អៀងលិចផ្លឹបតែម្ដង ប៉ុន្ដែសំណាងល្អភ្ញៀវទេសចរទាំងអស់សុទ្ធតែចេះហែលទឹកគ្រប់ៗគ្នា ហើយព្យាយាមហែលមកកាន់ច្រាំងដោយខ្លួនឯងដោយសុវត្ថិភាព ។
តាមការអះអាងពីជនបរទេសបានបញ្ជាក់ថា ពួកគេជិះទូកនេះក្នុងម្នាក់ៗត្រូវបង់ថ្លៃឈ្នួល២៥ដុល្លារ។ ក្រោយពេលទូកលិចពួកគេបានបាត់បង់សម្ភារៈមានដូចជាម៉ាស៊ីនថត ប្រាក់និងសម្ភារៈផ្សេងៗមួយចំនួនទៀត ។
ប្រជាពលរដ្ឋដែលនៅចោមរោមមើលកន្លែងកើតហេតុបានរិះគន់ទៅលើអាជ្ញាធរថាមិនអើពើចំពោះវត្ដមាននៃឧបទ្ទវហេតុនេះដែលមិនគួរបណ្ដែតបណ្ដោយឱ្យពួកគេរងគ្រោះហើយគ្មានអ្នកជួយសង្គ្រោះនោះទេ។ ចំណែកទូកទេសចរណ៍ដែលរកស៊ីក្រៅច្បាប់នោះក៏គ្មានការទទួលខុសត្រូវដែរ ព្រោះពួកគេមិនបានបំពាក់អាវពោងសុវត្ថិភាពដល់អ្នកដំណើរឡើយ ។
ដោយសារទូកទេសចរណ៍សមុទ្រមួយនេះរកស៊ីក្រៅច្បាប់ទើបឃុំបានទទួលសេចក្ដីជូនដំណឹងរបស់ក្រសួងធនធានទឹកស្ដីពីស្ថានភាពទឹកដែលនាំឱ្យកើតមានគ្រោះថ្នាក់បែបនេះ ។
ព្រឹត្ដិការណ៍ដ៏អកុសលនេះនឹងធ្វើឱ្យចំនួនភ្ញៀវទេសចរទៅកម្សាន្ដនៅខេត្ដកំពតត្រូវធ្លាក់ចុះជាពុំខាន បើសិនជាអាជ្ញាធរខេត្ដមិនចេញមុខមកទទួលខុសត្រូវចំពោះហេតុការណ៍នេះដោយផ្ទាល់ជាមួយភ្ញៀវបរទេសដែលជាជនរងគ្រោះនោះទេ។ ម្យ៉ាងទៀតម្ចាស់ទូកទេសចរណ៍ដែលបង្កឱ្យមានគ្រោះថ្នាក់នេះក៏ត្រូវក្របួចឱ្យមកទទួលខុសត្រូវនៅចំពោះមុខច្បាប់ដែរពោលគឺសម្រាប់ធានាឱ្យខាងតែបានដល់សុវត្ថិភាពជូនភ្ញៀវទេសចរ ពិសេសជនជាតិបរទេស ។
ក្រសួងធនធានទឹកនិងឧតុនិយម បានប្រកាសជូនដំណឹងដល់អាជ្ញាធរ និងប្រជាពលរដ្ឋមានលំនៅឋានរស់នៅតាមដងទន្លេមេគង្គតំបន់មាត់សមុទ្រ តំបន់ខ្ពង់រាបភាគឦសាន និងតំបន់វាលទំនាបកណ្ដាល ត្រូវបង្កើនការប្រុងប្រយ័ត្នដើម្បីចៀសវាងនូវគ្រោះថ្នាក់បណ្ដាលមកពីព្យុះ ភ្លៀងដែលអាចកើតមានចាប់ពីថ្ងៃទី២៦ ដល់ថ្ងៃទី២៩ ខែកក្កដា ឆ្នាំ២០១១ ។
សេចក្ដីជូនដំណឹងចុះផ្សាយនៅថ្ងៃទី២៥ ខែកក្កដា ចុះហត្ថលេខាដោយលោកលឹម គានហោ រដ្ឋមន្ដ្រីក្រសួងធនធានទឹក និងឧតុនិយម បានប្រកាសជូនដំណឹងដល់ពលរដ្ឋទាំងអស់ឱ្យបានដឹងថា បន្ទាប់ពីមន្ដ្រីជំនាញក្រសួងបានធ្វើការអង្កេតនិងតាមដានលើស្ថានភាពអាកាសធាតុក្នុងប៉ុន្មានថ្ងៃមកនេះឃើញថា ចាប់ពីថ្ងៃទី២៦ ដល់ថ្ងៃទី២៩ ខែកក្កដា ឆ្នាំ២០១១ ប្រទេសកម្ពុជានឹងទទួលឥទ្ធិពលពីប្រព័ន្ធសម្ពាធទាប ។
ក្រសួងធនធានទឹកបានសង្កត់ធ្ងន់ថា ប្រព័ន្ធសម្ពាធទាបដែលបានបក់បោកពីតំបន់ឈូងសមុទ្រចិនភាគខាងត្បូងកាត់ តាមមហាសមុទ្រឥណ្ឌាគឺកំពុងមានឥទ្ធិពលមកលើតំបន់ភាគខាងជើងនៃប្រទេសកម្ពុជា ៕
0 komentar:
Post a Comment
Give Your Comment And We Will Response You With Happy. No Moderation Comment, just Do Folow ^_^